Un torneo de poesía no Monte Xalo. Desta volta, en formato exhibición cos mellores “slammers” de Galicia.
O Poetry Slam, é unha competición que mestura a poesía coa interpretación. Ten influencia do teatro, o rap, a comedia en directo ou a performance. Aínda que existen varios formatos, o máis habitual é aquel no que os participantes teñen 3 minutos para presentar os seus textos empregando só o seu corpo e a súa voz e o público é quen decide o vencedor.
A diferenza doutros formatos como a regueifa ou as batallas de galos, os participantes no Slam Poetry non se enfrentan entre eles, senón que defenden a súa proposta para gañar o voto do público. Neste espectáculo de exhibición en Castelo, con Peter Brea como mestre de cerimonias, participarán Inés Mosquera, Galego de Caracas, Paula Pier, Debajo de la Palmera, Doutor Própole e Alicia Inconclusa.
