Un referente da nosa música tradicional para pechar a xornada do martes.
Tiruleque son xa un referente logo de máis de vinte anos sobre os escenarios. Álex, Alfonso, Miguel, Serxo, José, Pablo e Fer mesturan a música galega tradicional con outros estilos musicais na procura dunha innovación e evolución do seu son.
O repertorio de Tiruleque vén dese mundo vivo que une aos galegos e galegas nas romarías, foliadas, bailes e demais encontros que celebran a cultura do país
Nos concertos van da man a pandeireta e o contrabaixo, a muiñeira e a cumbia, o pandeiro e o ukelele, o saxo e o porco de goma. Elementos que nun principio non se imaxinan xuntos son asimilados e devoltos dunha forma propia e ao mesmo tempo universal, buscando “contaxiar o mesmo entusiasmo, alegría e espírito festivo que sentimos nós cando escoitamos estas músicas por primeira vez”.
Coa súa música, actuaron nos principais festivais de música tradicional e folk de Galicia, percorrendo a xeografía galega e estatal. A nivel internacional participou representando a Galicia no 41º e 49º Festival Intercéltico de Lorient.
