Na sección ‘Ver e escoitar’ da web do festival iremos subindo as imaxes, vídeos e entrevistas co máis interesante de cada xornada.
A web do Castelo Conta é o lugar onde atopar toda a información precisa para saber que vai acontecer, onde e cando; unha guía para non perder nada do que aquí acontece nesa semana na que Castelo vira no centro cultural da comarca. Aquí podes consultar toda a programación, ver as fichas dos eventos, mercar entradas, anotarte na andaina, mercar os tíckets do xantar e a cea do Día Grande… e, como novidade, tamén poderás Ver e escoitar.
Nesta sección xa podes escoitar os Contos de Castelo da pasada edición e tamén ver o vídeo resumo da presentación do festival así como unha galería das fotos do día. Durante a semana do festival, iremos subindo nesta sección as fotografías e vídeos do máis destacado da xornada, falando cos e coas protagonistas, os mellores momentos de cada evento e moito máis.
Queremos que veñas vivir con nós o Castelo Conta, pero se non podes vir, que non cho conten, mírao —e escóitao—ti. Onde? Aquí.
Xosé A. Touriñán participou este mércores no X Encontro Cultura y Ciudadanía, organizado polo Ministerio de Cultura en Santiago, no que o Castelo Conta foi convidado a participar nunha mesa de proxectos e no espazo expositivo.
Publicamos no noso Flickr todas as imaxes da última edición do festival, feitas por Aigi Boga.
